央視春晚愈來愈似科技新品發布會，宇樹科技今年就用一場《武 BOT》證明：人形機械人唔止識跳舞，仲可以喺高速奔跑下做隊形變換同武術動作。當然，最吸睛嘅唔係炫技本身，而係背後嗰套可遷移到真實場景嘅控制能力。
12 個月前，宇樹機械人嘅秧歌舞表演已經激發咗廣泛討論，今次更升級到跑酷、醉拳同雙節棍等武術動作，引起觀眾驚呼「進步太快」。環球時報提到，今次參演嘅機械人 H1、G1、H2 屬明顯升級版。除咗動作更激烈，仲加入器械表演同高速集群協同，令表演更接近「運動員級」場面。
晚會同場亦有其他初創公司（銀河通用、松延動力、MagicLab）展示人形機械人，但宇樹仍係最受關注嘅品牌。
In just one year, they have evolved from robots to "humans". 2025&2026 Chinese Spring Festival Gala pic.twitter.com/OxOH38JXEE— Tansu Yegen (@TansuYegen) February 16, 2026
宇樹提供嘅資料指，H1 機械人完成嘅翻桌跑酷、3 米高度空翻、單腳翻騰、以及 Airflare 大迴旋七周半等以機械人標準均屬於高難度動作（人類又何嘗不是？），且當中有多項「全球首次」。
而且呢類表演唔止挑戰機械人嘅關節爆發力同落地穩定性，亦考驗定位同運動控制喺劇烈動作後能唔能夠即時「拉返正」。
宇樹表示，今次表演仲達成咗「全球首次高速集群重定位」，任意跑位最高速度可達 4m/s，同時完成隊形變換同武術動作。另外，機械人亦配備自研「靈巧手」，可快速切換並穩定抓握武術道具，支援棍術、劍術同雙節棍等表演需要。
《武 BOT》表演尾段，1.8 米高嘅 H2 人形機械人帶來舞劍段落。而喺義烏分會場，H2 更以「齊天大聖」重甲造型登場，手持金箍棒，企喺由四足機械狗改造而成嘅「筋斗雲」裝置上，視覺效果十足。
🎉📱 Tech Facebook：https://www.facebook.com/yahootechhk
🎉📱 Tech Instagram：https://www.instagram.com/yahootechhk/
🎉📱 Tech WhatsApp 社群：https://chat.whatsapp.com/Dg3fiiyYf3yG2mgts4Mii8
🎉📱 Tech WhatsApp 頻道：https://whatsapp.com/channel/0029Va91dmR545urVCpQwq2D
🎉📱 Tech Telegram 頻道：https://t.me/yahootechhkThis article originally appeared on Yahoo Tech at https://hk.news.yahoo.com/%E5%AE%87%E6%A8%B9%E6%A9%9F%E6%A2%B0%E4%BA%BA-2026-%E6%98%A5%E6%99%9A%E5%86%8D%E9%80%B2%E5%8C%96%EF%BC%9A%E8%B7%91%E9%85%B7%E3%80%81%E9%86%89%E6%8B%B3%E3%80%81%E8%88%9E%E5%88%80%E5%BC%84%E6%A7%8D%EF%BC%8C%E4%BB%B2%E6%9C%89%E8%85%B3%E8%B8%A9%E3%80%8C%E7%AD%8B%E6%96%97%E9%9B%B2%E3%80%8D%E5%98%85%E6%A9%9F%E6%A2%B0%E6%82%9F%E7%A9%BA-053202179.html
