Google Pixel 10a 正式發布：US$499 照舊，電量 + 快充大升級，仲首度加入衛星 SOSEngadget
Google 嘅 Pixel A 系列一向靠「夠用、平價」取勝，今日發布嘅 Pixel 10a 幾明顯係走小改款路線。價格維持同上代相同，重點放喺提升續航同充電速度，仲將幾個旗艦級 AI 功能下放俾平價機。
Pixel 10a 延續 A 系列標誌性平面設計，相機條與機背融為一體，放到枱面都唔會搖動。機身仲有 IP68 防塵防水，螢幕用 Corning Gorilla Glass 7i 提升抗刮同抗跌。
Google 亦提到，Pixel 10a 採用 A 系列歷來最高比例嘅回收物料，包括 100％ 回收鋁金屬邊框同 81％ 回收塑膠背蓋。
Pixel 10a 繼續用 Google 自家 Tensor G4 處理器同 8GB RAM，儲存空間有 128GB 同 256GB 可選。官方表示 6.3 吋 FHD+ 螢幕比 Pixel 9a 亮 11％，用戶戶外睇相睇片會更清晰。
10a 係 Pixel A 系列中首款引入衛星 SOS 功能嘅手機，冇 Wi-Fi 同流動網絡都可以聯絡緊急服務，屬今代幾有話題性嘅新賣點。
續航係今次最明顯升級之一，Google 指 Pixel 10a 可用超過 30小時，開啟超級省電模式更可去到最多 120 小時。配合相容充電器，裝置大約 30 分鐘可充到 50％。如果你係重度用家，呢兩項升級比起換新晶片可能更有感。
相機硬體維持 48MP 主相機加 13MP 超廣角組合，與上代接近，但軟體同 AI 功能更完整。「相機教練」（Camera Coach）功能首度下放俾平價機，能用 Gemini 模型理解場景，逐步提示光線同構圖，令用家更易影到想要效果。Google 同時加入 Best Take（幫團體相揀最好表情）同 Add Me（後期把自己加返入相）等工具，主打「唔使修圖都更易出片」。
Pixel 10a 定價維持 US$499 起，並已開放預購，3 月 5 日起正式開賣。官方確認新機顏色包括黑、白、紅、紫四種，裝置將獲 7 年系統更新。
🎉📱 Tech Facebook：https://www.facebook.com/yahootechhk
🎉📱 Tech Instagram：https://www.instagram.com/yahootechhk/
🎉📱 Tech WhatsApp 社群：https://chat.whatsapp.com/Dg3fiiyYf3yG2mgts4Mii8
🎉📱 Tech WhatsApp 頻道：https://whatsapp.com/channel/0029Va91dmR545urVCpQwq2D
🎉📱 Tech Telegram 頻道：https://t.me/yahootechhkThis article originally appeared on Yahoo Tech at https://hk.news.yahoo.com/google-pixel-10a-%E6%AD%A3%E5%BC%8F%E7%99%BC%E5%B8%83%EF%BC%9Aus499-%E7%85%A7%E8%88%8A%EF%BC%8C%E9%9B%BB%E9%87%8F--%E5%BF%AB%E5%85%85%E5%A4%A7%E5%8D%87%E7%B4%9A%EF%BC%8C%E4%BB%B2%E9%A6%96%E5%BA%A6%E5%8A%A0%E5%85%A5%E8%A1%9B%E6%98%9F-sos-161858342.html
