上週末小鵬旗下人形機械人 IRON 喺深圳灣萬象城 Wave 廣場進行首次公開行走示範，某次完成「貓步」後站立嘅過程中，機械人意外失衡側向倒地，最後由工作人員抬離現場。現場網民表示，IRON 當日其實完成咗多次行走展示，整體都算順，只係其中一次出現意外，並非「全程失準」。
It reminds me of how all children learn to walk: after they fall, they steady themselves, and the next step is to start running, and keep on running. https://t.co/sZCbXqTj0f
— Xiaopeng He (@xiaopenghexpeng) February 2, 2026
主持人一句圓場，高層亦快速正面回應
現場主持人見到 IRON 跌倒後以「人生道路也要經歷挫折」作圓場，畫面尷尬得嚟又幾有記憶點。小鵬汽車副總裁于濤其後發文指 IRON 係面向市民、尤其小朋友作真實行走示範，當日行走多次、只係摔咗一次，並笑言「呢一摔」反而令大家更難再懷疑係真人扮演。
公司創始人何小鵬亦轉發回應，形容呢一幕令佢諗起小朋友學步：跌倒後會站穩，下一步就係開始奔跑，並持續奔跑。呢種「唔迴避、唔搵藉口」嘅回應方式，令事件由單純翻車片，變成一次相當成功嘅公關展示。
點解一跌就爆紅？因為之前太似真人
IRON 早前喺小鵬 2025 年 AI Day 活動上亮相並示範「貓步」，一度引發網民質疑「感覺係真人努力扮演機械人」。其後小鵬為回應「機械人內藏真人」嘅說法，曾展示剪開腿部覆蓋件、公開內部機械結構作自證。
正正因為有呢段背景，今次跌倒畫面先會被網民解讀成「反證」：如果係真人扮，理論上唔需要被人抬走先離場。當然，呢種講法更多係網民玩梗，並唔等同技術結論。
IRON 背景與量產目標：小鵬想轉型「具身智能公司」
報道提到，小鵬喺去年 11 月提出新定位，將公司願景指向「全球物理 AI 科技公司」，並定下 2026 年年底實現規模量產高階人形機械人嘅目標。由展示到量產，中間仍要經歷大量跌倒、修正、再訓練，某程度上亦呼應何小鵬所講嘅「學步」比喻。
更多內容：
緊貼最新科技資訊、網購優惠，追隨 Yahoo Tech 各大社交平台！
🎉📱 Tech Facebook：https://www.facebook.com/yahootechhk
🎉📱 Tech Instagram：https://www.instagram.com/yahootechhk/
🎉📱 Tech WhatsApp 社群：https://chat.whatsapp.com/Dg3fiiyYf3yG2mgts4Mii8
🎉📱 Tech WhatsApp 頻道：https://whatsapp.com/channel/0029Va91dmR545urVCpQwq2D
🎉📱 Tech Telegram 頻道：https://t.me/yahootechhk
This article originally appeared on Yahoo Tech at https://hk.news.yahoo.com/%E5%B0%8F%E9%B5%AC-iron-%E4%BA%BA%E5%BD%A2%E6%A9%9F%E6%A2%B0%E4%BA%BA%E7%B7%9A%E4%B8%8B%E9%A6%96%E7%A7%80%E3%80%8C%E4%BB%86%E4%B8%80%E4%BB%86%E3%80%8D%E5%8D%B3%E7%98%8B%E5%82%B3%EF%BC%9A%E9%AB%98%E5%B1%A4%E5%9B%9E%E6%87%89%E8%A2%AB%E8%AE%9A%E8%AD%98%E7%8E%A9%EF%BC%8C%E8%B7%8C%E5%80%92%E5%8F%8D%E8%80%8C%E6%9B%B4%E5%83%8F%E6%9C%AA%E4%BE%86%EF%BC%9F-120316826.html
